Target ng Technical Education and Skills Development Authority (TESDA) Romblon na maabot ang lahat ng munisipyo sa lalawigan ngayong 2026 sa pamamagitan ng pagpapalawak ng kanilang scholarship at training programs para mapalakas ang oportunidad sa trabaho ng mga residente.
Sa panayam ng PIA Romblon, sinabi ni TESDA Romblon Provincial Director Glenn Niño M. Sartillo na kabilang sa mga prayoridad ngayong taon ang pagdadala ng mga programa sa mga geographically isolated at disadvantaged areas sa lalawigan.
Ayon kay Sartillo, sa unang pagkakataon ay mararating ng TESDA ang bayan ng Concepcion kung saan nakatakdang maghatid ng mga training program tulad ng Organic Agriculture Production sa pagitan ng Abril hanggang Mayo, at iba pang kurso na inaasahang ilulunsad sa mga susunod na buwan.
Dagdag pa niya, isinusulong ng TESDA ang isang demand-driven approach kung saan ibinabatay ang mga programang inaalok sa pangangailangan ng bawat munisipyo upang matiyak na ang mga kasanayang matututunan ay direktang makatutulong sa kabuhayan ng mga benepisyaryo.
“Kung ano po ang kailangan ng munisipyo, iyon po ang dinadala nating programa,” ani Sartillo, sabay-diin na layunin ng ahensya na maging inclusive ang kanilang mga proyekto at walang maiiwang komunidad sa lalawigan.
Maliban sa Concepcion, nakatakda ring maghatid ng iba’t ibang training program ang TESDA sa mga bayan ng Banton, Corcuera, at San Jose, bilang bahagi ng pagpapalawak ng kanilang serbisyo sa buong Romblon.
Nakikipagtulungan din ang TESDA sa mga Technical Vocational Institutions sa lalawigan upang mas mapalawak ang abot ng kanilang mga programa at matiyak ang kalidad ng pagsasanay sa mga kalahok.
Inaasahan ng ahensya na sa pamamagitan ng pagpapalawak ng scholarship programs, mas maraming Romblomanon ang magkakaroon ng sapat na kasanayan na magagamit sa paghahanap ng trabaho o pagtatayo ng sariling kabuhayan, alinsunod sa layunin ng pamahalaan na palakasin ang workforce at suportahan ang lokal na ekonomiya.
