Itinaas ng PAGASA ang Tropical Cyclone Wind Signal No. 1 sa lalawigan ng Romblon matapos pumasok sa Philippine Area of Responsibility (PAR) ang Bagyong Uwan nitong Biyernes ng gabi.
Sa Tropical Cyclone Bulletin No. 2 na inilabas alas-11 ng gabi, sinabi ng PAGASA na huling namataan ang sentro ng bagyo sa layong 1,045 kilometro silangan ng Eastern Visayas dakong alas-10 ng gabi.
Taglay nito ang lakas ng hanging aabot sa 120 km/h malapit sa gitna at pagbugsong umaabot sa 150 km/h habang kumikilos pa-kanluran hilagang-kanluran sa bilis na 20 km/h.
Sinabi ng PAGASA na malawak ang sirkulasyon ng Uwan, na may dalang malalakas hanggang typhoon-force winds sa distansyang hanggang 780 kilometro mula sa sentro.
Ayon pa sa PAGASA, posibleng maging super typhoon ang Uwan pagsapit ng Sabado ng gabi o Linggo ng umaga. May mataas din na posibilidad na tumama ito sa kalupaan ng Isabela o Aurora late Sunday o early Monday.
