Nagbabala ang DOST-PAGASA na may mataas na posibilidad na maging ganap na bagyo ang low pressure area (LPA) na kasalukuyang nasa loob ng Philippine Area of Responsibility, at inaasahang magdadala ito ng malalakas na pag-ulan sa lalawigan ng Romblon simula Lunes.
Huling na-monitor ang LPA sa layong 715 kilometro silangan ng Hinatuan, Surigao del Sur. Ayon sa PAGASA, posibleng tumawid ang sistema sa landmass ng bansa mula Lunes ng hapon hanggang Miyerkules.
Batay sa 24-hour rainfall forecast, inaasahang makakaranas ang Romblon ng 100–200mm na ulan mula Lunes ng hapon hanggang Martes ng hapon, habang 50–100mm na ulan naman ang posibleng maranasan mula Martes ng hapon hanggang Miyerkules ng hapon.
Dahil sa dami ng inaasahang ulan, maraming pagbaha ang posible, lalo na sa mga urbanized areas, mabababang lugar, at mga nakatira malapit sa ilog. Nagbabala rin ang PAGASA na malaki ang tiyansang magkaroon ng landslide sa mga lugar na classified bilang moderate to highly susceptible.
Pinapayuhan ang publiko na patuloy na mag-monitor sa mga susunod na weather advisories at maging handa sa posibleng paglikas kung kinakailangan.
