Dahil pumatak ng Biyernes ang Pebrero 14 o Araw ng mga Puso nakaraang linggo, nang-iintriga ang marami nitong kurimaw na dapat daw isalang ng mga may asawa sa matinding interogasyon ang kani-kanilang partner sa buhay kung bigla itong nag-overtime at hindi kaagad nakauwi ng bahay.
Kung karaniwan daw kasing araw ng “original” ang Feb.14, at araw ng mga “side bet” ang Feb.13 at Feb.15, posibleng iba raw ang nangyayari kapag nataon sa Biyernes ang Araw ng mga Puso. Kasi nga naman, karaniwang matrapik kapag Biyernes at may mga kompanyang nagpapasahod na ng 14 dahil Sabado ang 15.
Kaya naman ang mangyayari sabi ng ating mga kurimaw, posibleng gumawa ng dahilan ang mga may “side bet” na mag-o-overtime o kaya ay naaya ng kaibigan para may maipaliwanag kung bakit hindi kaagad siya nakauwi ng bahay. Pero baka ang totoo, nag-celebrate na siya ng V-Day at nagkainan, este kumain kasama ang ibang babae, o lalaki.
Kung mahusay ang lalaki para makaiwas sa paninita ni kumander, bibili dapat siya ng bulaklak o chocolate para makabawi at kunwaring hindi nakalimutan si original. At siyempre pagsapit ng Sabado, mag-aaya siyang lumabas para si original naman ang kasama sa post V-Day celebration.
Hindi lang daw sa mga mag-asawa puwede ang ganiyang sitwasyon, sabi ng ating kurimaw. Kahit ang mga mag-jowa pa lang, uubra ‘yan. Pero may dagdag na tanong kapag Valentine, ang araw kasing ito eh nagiging araw din ng “pagsuko” ng “Bataan” ng mga kababaihan. Kaya marami ang ipinapanganak ng November o kayay huling linggo ng October, alam nyo na kung bakit?
Malamang na gamit na gamit na naman ng mga kelot ang linyang, “Patunayan mong mahal mo ako.” Para-paraan ‘yan ng mga lalaki para maikama ang mga syota nila. Kung ikaw naman ang babae, puwede ka ring maghamon na patunayan niyang mahal ka niya: “Pakasalan mo muna ako.”
Iyon nga lang, baka madaan sa drama at maggagalit-galitan lang ang lalaki at bibigay na si babae. Wala na siyang magagawa kung hindi sumama sa lugar na silang dalawa lang para patunayan ang kaniyang pagmamahal. Ingat ka lang ineng at baka ang kumag mong boyfriend eh humirit pa na i-video ang inyong gagawin para may “souvenir.”
At dahil may mga panawagan na lumayo muna sa matataong lugar ngayon dahil sa banta ng novel coronavirus, aba’y may isa pang magandang alibi ang mga dayukdok para mag-aya na magpunta na lang sila sa isang lugar na silang dalawa lang para sa “safe” sa virus. Pero yung mga maghahabol pa rin sa mga motel, aba’y i-check nyong mabuti na napalitan ang bedding at baka may mahigaan pa kayong malagkit.
Hindi natin alam kung may ginawa nang survey dito sa Pilipinas tungkol sa mga humihirit ng sex kapag Valentine’s Day. Alam naman natin mahiyain ang mga Pinoy na pag-usapan ang sex. Sa bahay nga eh parang sakit na iniiwasan na pag-usapan ‘yan lalo na kung teenager pa ang mga anak. At kung magkaroon man ng survey, hindi naman tayo makatitiyak na totoo ang isasagot ng mga matatanong. Baka marami lang ang magiging “ipokrito at ipokrita.”
Pero sa isang survey sa Amerika na ginawa raw ng isang sikat na online site, lumilitaw sa 2,000 na tinanong na 92% ng mga lalaki ang nagsabing gusto nilang makasama ang babaeng mahal nila sa V-Day. Sa bilang na ito, 90% ang aminadong sex ang gusto sa Valentine.Kung ganito rin ba ang mentalidad ng mga Pinoy, hindi natin alam.
Ngunit sabi ng mga matatanda, iba na raw ang panahon ngayon na daig pa ng mga kabataan ang mga kuneho sa init ng katawan. Kaya ang mga bebot na aayain ng kanilang boyfriend na magsimba sa Araw ng mga Puso, dalawa lang ang puwedeng mangyari niya— maaaring malinis talaga ang kanyang hangarin o baka mauwi siya sa pagpapari.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
