Sinibak ng Supreme Court (SC) ang isang kawani ng Municipal Trial Court (MTC) ng Romblon, Romblon dahil sa serious dishonesty at gross misconduct matapos mapatunayang nagkamal ng pondo ng korte, habang sinuspinde naman ng walong buwan ang clerk of court dahil sa kapabayaan sa pangangasiwa ng pondo.
Kinilala ng Supreme Court ang clear of court na si Rose Ann R. Marzonia.
Sa inilabas na desisyon, inatasan din ng SC sina Marzonia, at si Wina Cometa, Clerk of Court II, na sama-samang bayaran ang nawawalang pondo na nagkakahalaga ng ₱598,444.20.
Nag-ugat ang kaso sa financial audit ng Office of the Court Administrator (OCA) na sumaklaw mula Pebrero 2008 hanggang Marso 2023. Natuklasan sa audit ang kakulangan sa walong pondo ng korte, kabilang ang Fiduciary Fund, Sheriff’s Trust Fund, Judiciary Development Fund, Mediation Fund at iba pang pondo para sa operasyon ng hudikatura.
Batay sa audit, paulit-ulit umanong nag-withdraw si Marzonia ng pondo ng korte nang walang pahintulot at hindi idineposito ang mga nakolektang bayad.
Inamin din niya ang pakikialam sa mga passbook ng Fiduciary Fund at Sheriff’s Trust Fund sa tulong ng mga indibidwal sa Recto, Manila. Kabilang din sa mga natuklasan ang pamemeke sa mga lagda ng presiding judge at ni Cometa sa mga withdrawal slip.
Dahil sa paulit-ulit na pamemeke ng mga dokumentong pinansyal, hindi awtorisadong pag-withdraw at maling paggamit ng pondo, sinabi ng SC na nagpapakita ang mga ginawa ni Marzonia ng sinadyang pamamaraan upang dayain ang hudikatura at pagtakpan ang kanyang mga aksyon.
Dahil sa bigat ng mga paglabag, ipinag-utos ng Korte ang kanyang pagkakatanggal sa serbisyo, pagkawala ng lahat ng benepisyo at pagbabawal na maibalik sa serbisyo o mahirang sa anumang posisyon sa pamahalaan.
Samantala, walong buwang suspensyon naman ang ipinataw kay Cometa dahil sa gross neglect of duty o matinding kapabayaan sa tungkulin.
Gayunman, nilinaw ng SC na walang ebidensiyang direktang nakilahok si Cometa sa pagkuha ng pondo, pamemeke ng mga dokumento o nakinabang sa mga iregularidad. Isinaalang-alang din ng Korte na ito ang unang paglabag ni Cometa at nagsilbi siya sa hudikatura nang humigit-kumulang 30 taon nang walang naunang parusa.
Binigyang-diin ng SC na hindi maaaring iwasan ng mga clerk of court ang pananagutan sa pamamagitan lamang ng pag-asa sa tila regular na mga dokumento o pagsisi sa kanilang mga tauhan.
Inatasan naman ng SC ang Bureau of Immigration na maglabas ng hold departure order laban kay Marzonia.
Muling iginiit ng Korte na ang posisyon sa pamahalaan ay isang tiwala ng publiko at kailangang panatilihin ng lahat ng opisyal at kawani ng korte ang mataas na pamantayan ng katapatan, integridad at pananagutan.
