Nilagyan ng mga device na may GPS technology ang mga sasakyang pandagat sa San Jose, Romblon sa ilalim ng proyektong Sea-condition Emergency Alert and Warning Apparatus for Vessels Safety (SEAWAVeS) ng Department of Science and Technology (DOST) upang mapahusay ang pagsubaybay sa mga bangka at kaligtasan sa paglalayag.
Isinagawa ng DOST-MIMAROPA, sa pamamagitan ng Romblon Provincial Science and Technology Office, ang tatlong araw na technology deployment mula Oktubre 27 hanggang 29, katuwang ang Aklan State University, Provincial Disaster Risk Reduction and Management Office (PDRRMO), Municipal Disaster Risk Reduction and Management Office (MDRRMO) ng San Jose, at Philippine Coast Guard (PCG).
Ayon sa DOST, ang San Jose ang unang bayan sa MIMAROPA Region na nakinabang sa deployment ng SEAWAVeS technology.
Binuo ng Aklan State University sa pangunguna ni Dr. Julie Ann A. Salido ang SEAWAVeS, isang teknolohiyang gumagamit ng mobile application at mga device na ikinakabit sa maliliit na sasakyang pandagat upang mangalap at magpadala ng impormasyon tungkol sa lokasyon at kondisyon ng paglalayag.
Sa pamamagitan ng sistema, maaaring maipadala sa online monitoring platform ang mga datos mula sa mga bangka, kabilang ang mga coordinate ng lokasyon at mga alerto batay sa natukoy na kondisyon ng dagat. Dinisenyo rin ang teknolohiya upang makapagpadala ng babala sa mga kinauukulang awtoridad kapag may natukoy na mapanganib na kondisyon sa paglalayag.
Inaasahang makatutulong ang teknolohiya sa pagsubaybay sa mga bangka, partikular sa mga biyahero at mangingisda sa mga komunidad na umaasa sa transportasyong pandagat.
Kasabay ng deployment, nagsagawa rin ang PCG Romblon Station at San Jose Sub-Station ng Basic Water Safety Training na sumaklaw sa mga pangunahing kasanayan sa paglangoy.
