Kabuuang 37 estudyante ang nagtapos sa Diploma in Mechanical Engineering Technology (DMET) ng Romblon National Institute of Technology (RNIT) sa kauna-unahang commencement ceremony ng programa noong Oktubre 27 sa Alcantara Public Auditorium.
Ang mga nagsipagtapos ang kauna-unahang batch ng RNIT na nakatanggap ng diploma sa DMET, matapos ang tatlong taong pagsasanay na nagbigay sa kanila ng teknikal na kaalaman at kasanayang magagamit sa paghahanap ng trabaho at pagbuo ng karera.
Sa ilalim ng Universal Access to Quality Tertiary Education Act, libre ang pagsasanay ng mga mag-aaral sa programa. Nakatanggap din sila ng mga suportang pinansyal na kinabibilangan ng ₱5,000 na book allowance, ₱500 na uniform allowance, at ₱9,000 na Training Support Fund kada semestre.
Sa loob ng tatlong taon sa RNIT, nakakuha rin ang mga mag-aaral ng 18 National Certificates (NCs) sa iba’t ibang larangan ng teknikal-bokasyonal na pagsasanay. Kabilang sa mga kasanayang saklaw nito ang welding, automotive servicing, electrical installation and maintenance, at iba pang teknikal na serbisyo.
Isinagawa ang pagtatapos sa ilalim ng temang “Angat sa Kasanayan, Angat sa Kinabukasan,” na dinaluhan ng mga nagsipagtapos, kanilang mga pamilya, at mga kinatawan ng Technical Education and Skills Development Authority (TESDA).
Sa kanyang mensahe, hinikayat ni guest speaker Rhea Lynn Fojas, isang alumna ng dating Alcantara National Trade School, ang mga nagsipagtapos na patuloy na paunlarin ang kanilang mga kasanayan at isabuhay ang puso at malasakit sa kanilang propesyon.
Binigyang-diin din ni Fojas na hindi dapat maging hadlang ang pagiging babae sa pagpasok sa mga larangang tradisyonal na pinangingibabawan ng mga lalaki.
Samantala, tinalakay ni TESDA MIMAROPA Regional Director Baron Jose Lagran ang kahalagahan ng teknikal-bokasyonal na edukasyon at ladderized learning bilang daan sa karagdagang pag-aaral at mas maraming oportunidad sa trabaho.
Dumalo rin sa seremonya sina Congressman Budoy Madrona, Governor Trina Firmalo-Fabic, mga opisyal ng pamahalaang panlalawigan at lokal, at mga kinatawan ng iba’t ibang ahensiya ng pamahalaan.
