Nasawi ang isang security guard matapos pagtatagain umano ng kapwa niya guwardiya habang naka-duty sa guardhouse ng Romblon State University (RSU) San Andres campus nitong Miyerkules ng hapon, October 14.
Batay sa mga saksi na nakausap ng Romblon News Network, dakong alas-2 ng hapon nang makarinig sila ng sigawan mula sa guardhouse. Ilang sandali pa ay nagkaroon umano ng komosyon sa loob ng lugar hanggang sa matagpuan ang biktima na nakahandusay at nagtamo ng maraming sugat sa iba’t ibang bahagi ng katawan.
Matapos ang insidente, kusang sumuko sa San Andres Municipal Police Station ang suspek.
Agad namang isinugod ang biktima sa San Andres Municipal Hospital, ngunit hindi na ito naisalba dahil sa tindi ng mga tinamong sugat.
Ayon kay Major Nanette Pablico, hepe ng San Andres Municipal Police Station, lumalabas sa paunang imbestigasyon na matagal nang may alitan ang dalawa. Bago ang insidente, nagkaroon umano ng asaran habang nagpapalitan ng duty ang dalawa, na nauwi sa pananaga sa biktima.
Nasa kustodiya na ng pulisya ang suspek habang inihahanda ang kaukulang kasong isasampa laban dito.
Sa ngayon, wala pang inilalabas na pahayag ang Romblon State University kaugnay ng insidente.
