Tumapos sa ika-5 puwesto si Arena International Master (AIM) Jerick Faeldonia sa kanyang unang international tournament matapos magtala ng pitong puntos sa 2nd Summer International Chess Open Tournament sa Standard Category – Challenger Division na ginanap mula Hulyo 28 hanggang Agosto 2, 2026 sa Benja Hotel sa Bangkok, Thailand.
Nilahukan ang torneo ng 176 na chess players mula sa iba't ibang bansa.
Nagsimula si Jerick sa apat na magkakasunod na panalo laban kina Wallace Sheradan ng Australia, Nakorn Nakthip ng Thailand, Bang-Fu Yeh ng Chinese Taipei, at Gavin Siridanupath ng Thailand.
Sa ikalimang round, natalo siya kay John Franz De Asis ng Pilipinas. Nakabawi naman siya sa sumunod na dalawang round matapos talunin sina Giecel Pacubat ng Pilipinas at Prakash Satyam ng India. Nagtapos sa tabla ang kanyang huling dalawang laban laban kina John Paul De Guzman ng Pilipinas at Kamaluddin Yusof ng Malaysia.
Bukod sa kanyang ika-5 puwestong pagtatapos, nakuha rin ni Jerick ang Top Junior Award matapos makuha ang pinakamataas na puntos sa lahat ng kalahok na may edad 18 pababa.
Ayon sa opisyal na resulta ng torneo, inaasahang madaragdagan ng 25.6 rating points ang kasalukuyan niyang 1935 FIDE Elo rating mula sa Bangkok tournament. May karagdagang 15 rating points rin siyang nakuha mula sa isang torneo sa PACE Novaliches.
