Batay sa sumbong na nakarating sa Romblon News Network mula sa mga kamag-anak ng biktima, nagtungo sa himpilan ng pulisya bandang alas-9 ng gabi noong July 9 ang ina ng bata upang iulat ang insidente. Sa imbestigasyon umano ng pulisya, sinabi ng nagrereklamo na bandang alas-5 ng hapon ay umalis siya ng kanilang bahay kasama ang kanyang dalawang taong gulang na anak upang magpahilot dahil nilalagnat ang bata.
Pagbalik umano niya makalipas ang 30 minuto, nakarinig siya ng kakaibang ingay mula sa loob ng kanilang bahay. Nang sumilip siya sa bintana, nakita umano niyang hubad ang suspek. Agad umano siyang pumasok sa bahay at kinompronta ito, bago mabilis na nagsuot ng shorts ang lalaki. Nakita rin umano ng ina ang kanyang 9-anyos na anak na nagtatago malapit sa pintuan.
Sa isinagawang panayam ng mga imbestigador, isiniwalat umano ng biktima na paulit-ulit siyang seksuwal na inaabuso ng kanyang stepfather tuwing wala ang kanyang ina sa bahay mula pa nang siya ay walong taong gulang.
Patuloy ang isinasagawang imbestigasyon ng San Andres Municipal Police Station kaugnay ng insidente.
