Mas mapapabuti ang post-harvest facilities at kabuhayan ng mga mangingisda sa bayan ng Calatrava matapos lagdaan ang Memorandum of Agreement (MOA) para sa Improvement of the Fish Port and Establishment of an Ice Plant sa munisipalidad.
Sa ilalim ng proyekto, magtatayo ang Philippine Fisheries Development Authority (PFDA) ng 15-metric ton-per-day ice plant at isasagawa ang pagpapabuti ng fish port sa pakikipagtulungan ng Pamahalaang Bayan ng Calatrava upang mapalakas ang fish handling, storage, at distribution sa lugar.
Nilagdaan ang kasunduan nina PFDA Acting General Manager Atty. Glen Pangapalan at Calatrava Mayor Robert Fabella.
Bahagi ang proyekto ng pagpapalawak ng post-harvest facilities ng pambansang pamahalaan sa ilalim ng administrasyon ni Pangulong Ferdinand R. Marcos Jr., sa pamamagitan ng Department of Agriculture sa pamumuno ni Secretary Francisco Tiu Laurel Jr., na naglalayong gawing moderno ang imprastraktura sa sektor ng pangisdaan at mapabuti ang kabuhayan ng mga mangingisda.
Layunin ng proyekto na mapahusay ang suplay, accessibility, at affordability ng isda at iba pang produktong pangisdaan sa pamamagitan ng sapat na post-harvest facilities. Inaasahan din nitong mababawasan ang post-harvest losses, mapapahusay ang sanitary fish handling practices, mapalawak ang market opportunities, at makalikha ng karagdagang kabuhayan sa sektor ng pangisdaan.
Sa pamamagitan ng bagong ice plant, mas mapapanatili ang kalidad at kasariwaan ng mga huling isda, mababawasan ang pagkasira ng produkto, mapahahaba ang shelf life nito, at magkakaroon ng mas magandang presyo sa merkado.
Batay sa feasibility study ng proyekto, tinatayang umaabot sa 12,873.8 metric tons o humigit-kumulang 35.27 metric tons kada araw ang taunang produksyon ng isda sa Calatrava. Samantala, nasa 517.82 metric tons lamang kada taon o 1.42 metric tons kada araw ang lokal na demand, na nagpapakita ng malaking fish surplus na maaaring suportahan ang mas malawak na marketing at distribusyon.
Ayon kay Mayor Fabella, malaking hakbang ang proyekto sa pagpapalakas ng industriya ng pangisdaan sa bayan.
“Malaking tulong ito sa ating mga mangingisda dahil mapapanatili ang kalidad ng kanilang huli, mababawasan ang post-harvest losses, at mas mapapalakas natin ang industriya ng pangingisda sa Calatrava at karatig-bayan,” ani Fabella.
Inaasahan ding mapapahusay ng proyekto ang fish landing at post-harvest operations, mapalalakas ang pagsunod sa food safety standards, at madaragdagan ang pagkakakitaan ng mga komunidad ng mangingisda.
Ang proyekto ay bahagi ng patuloy na programa ng pamahalaan sa modernisasyon ng fisheries infrastructure, pagpapalakas ng food security, at pagpapabuti ng post-harvest system sa ilalim ng Bagong Pilipinas agenda.
