Sumailalim sa serye ng digital skills training ang mga miyembro at opisyal ng iba’t ibang kooperatiba sa lalawigan ng Romblon bilang bahagi ng pagpapalakas ng kanilang kaalaman sa digital technology, cybersecurity, at online business platforms.
Pinangunahan ang aktibidad ng Department of Information and Communications Technology (DICT), Department of Trade and Industry (DTI), Cooperative Development Authority (CDA), Romblon State University (RSU), Pamahalaang Panlalawigan ng Romblon, at lokal na pamahalaan ng Odiongan.
Sa ikalawang araw ng pagsasanay, nagsagawa si Wenna Mae Foja ng DICT Romblon ng orientation hinggil sa eGovPH application, kung saan hinikayat ang mga kooperatiba na gamitin at ipakilala ang platform sa kanilang mga opisina at mga kliyente.
Ipinaliwanag ni Foja na ang eGovPH ay isang one-stop digital platform na nagbibigay-daan upang ma-access ng publiko ang iba’t ibang serbisyo at transaksyon ng pamahalaan gamit ang mobile devices.
Ayon sa DICT, bahagi ito ng pagsusulong ng digital transformation program ng administrasyon ni Ferdinand R. Marcos Jr. upang mapalawak ang access ng mamamayan sa mga serbisyo ng gobyerno.
Samantala, pinangunahan ni Oliver Musca Jr., mula rin sa DICT Romblon, ang seminar ukol sa cybersecurity awareness kung saan tinalakay ang mga karaniwang online threats tulad ng phishing scams, online fraud, identity theft, at malicious links.
Binigyang-diin niya ang kahalagahan ng pagprotekta sa personal at organizational data sa pamamagitan ng paggamit ng mas ligtas na online practices gaya ng paggawa ng malalakas na password at pagberipika ng online transactions.
Kabilang din sa mga tinalakay sa training ang paggamit ng chatbot technology bilang bahagi ng pagpapakilala sa mga kooperatiba sa mga makabagong digital tools na maaaring makatulong sa customer engagement at operasyon ng kanilang organisasyon.
Nagsagawa rin ang DTI Romblon ng lecture tungkol sa e-commerce at paggamit ng online marketplaces upang mapalawak ang pagbebenta at marketing ng mga produkto ng kooperatiba.
Samantala, tinalakay naman ng RSU at Provincial Information Office ang social media management at graphic designing upang matulungan ang mga kooperatiba sa pagpapalakas ng kanilang online presence at promotional campaigns.
Ayon sa mga organizer, bahagi ang aktibidad ng patuloy na pagsisikap ng pamahalaan at mga partner institutions na ihanda ang mga lokal na kooperatiba sa lumalawak na digital economy at mas mapalawak pa ang oportunidad para sa kanilang mga negosyo.
