Binigyang-pugay at ginawaran ng cash incentives ang mga atletang Romblomanon na nagwagi sa MIMAROPA Regional Athletic Association Meet 2026 sa isang programang pinangunahan ni Congressman Eleandro Jesus “Budoy” Madrona.
Pinangunahan ni Congressman Madrona ang pamamahagi ng cash incentives para sa mga atletang mula sa mga bayan ng Romblon, Magdiwang, Cajidiocan, at San Fernando na nakapag-uwi ng medalya sa kani-kanilang mga larong sinalihan.
Sa kabuuang resulta, nakapagtala ang delegasyon ng Romblon ng kabuuang 123 medalya.
Ayon kay Schools Division Superintendent Roger F. Capa, ang pagkilalang ibinigay sa mga atleta ay patunay ng tuloy-tuloy na suporta mula sa paghahanda sa Provincial Meet, pagsasanay, aktuwal na laban sa MRAA, hanggang sa pagbibigay ng gantimpala sa kanilang tagumpay. Aniya, malinaw itong mensahe na pinahahalagahan ang sakripisyo at husay ng mga atletang Romblomanon.
Dagdag pa ni Capa, bukod sa cash incentives mula kay Congressman Madrona, kasalukuyan ding pinoproseso ang karagdagang insentibo mula sa mga pamahalaang bayan sa pangunguna ng mga alkalde, gayundin mula sa pamahalaang panlalawigan sa pamumuno ni Governor Trina Alejandra Firmalo-Fabic.
Dumalo rin sa okasyon sina Vice Governor Arming Gutierrez, Chief of Staff Denon F. Madrona, Mayor Gard S. Montojo, mga miyembro ng Sangguniang Panlalawigan, at Schools Division Superintendent Roger F. Capa bilang suporta sa mga atletang nagbigay karangalan sa probinsya.
Magpapatuloy ang pagbibigay ng insentibo sa iba pang atleta mula sa Tablas at Tres Islas sa susunod na programa na gaganapin sa Looc Central Elementary School.
