Naitala ng Team Romblon ang kanilang pinakamataas na medal haul matapos makakuha ng kabuuang 123 medalya sa katatapos lamang na MIMAROPA Regional Athletic Association Meet 2026 na ginanap sa Sablayan mula Marso 9 hanggang 12, 2026.
Ito na ang pinakamaraming medalya na nakuha ng Romblon sa kasaysayan ng kanilang paglahok sa MRAA Meet, kabilang na ang mga taon noong bahagi pa sila ng Southern Tagalog Regional Athletic Association (STRAA) kung saan magkakasama pa sa iisang rehiyon ang mga lalawigan ng Region IV.
Sa Elementary Level, nakakuha ang Team Romblon ng 13 gold, 14 silver at 22 bronze medals upang makuha ang ikaapat na puwesto. Samantala, sa Secondary Level ay nakapagtala sila ng 22 gold, 16 silver at 36 bronze medals na nagbigay din sa kanila ng ikaapat na puwesto sa nasabing dibisyon.
Sa kabuuan, nakahakot ang Team Romblon ng 35 gold, 30 silver at 58 bronze medals upang makuha ang ikalimang puwesto sa overall standings ng kompetisyon.
Nakuha ng Puerto Princesa ang overall championship matapos makapagtala ng 143 gold, 92 silver at 75 bronze medals. Pumangalawa naman ang Oriental Mindoro na may 106 gold, 135 silver at 107 bronze medals. Pumangatlo ang Palawan na may 50 gold, 37 silver at 44 bronze medals, habang ikaapat ang Calapan na may 40 gold, 42 silver at 72 bronze medals.
Sumunod sa Romblon sa ika-anim na puwesto ang Occidental Mindoro na may 26 gold, 53 silver at 74 bronze medals, habang nasa huling puwesto ang Marinduque na may 5 gold, 17 silver at 28 bronze medals.
Kabilang sa mga larangang nagbigay ng gintong medalya sa Romblon ang chess, football, futsal, athletics, billiards, taekwondo at archery.
Ang mga atletang nagkamit ng gintong medalya sa kompetisyon ay kwalipikado na para kumatawan sa rehiyon sa Palarong Pambansa 2026 na gaganapin sa Agusan del Sur mula Mayo 24 hanggang 31, 2026.
