Tiniyak ng Romblon Municipal Police Station (MPS) ang pinaigting na seguridad at mga hakbang sa kaligtasan ng publiko kaugnay ng nalalapit na Biniray Festival 2026, isa sa pinakamalaking relihiyoso at kultural na pagdiriwang sa bayan ng Romblon.
Sa isang press statement, sinabi ng Romblon MPS na magpapatupad sila ng mas mataas na police visibility sa pamamagitan ng foot at mobile patrols, gayundin ng mahigpit na koordinasyon sa Local Government Unit, mga opisyal ng barangay, force multipliers, at iba pang law enforcement agencies upang masiguro ang mapayapa at maayos na pagdaraos ng lahat ng aktibidad ng pista.
Hinikayat din ng pulisya ang mga residente, deboto, at mga bisita na makipagtulungan sa mga awtoridad, sumunod sa mga safety protocols, at agad na iulat ang anumang kahina-hinalang aktibidad o emergency sa pinakamalapit na pulis o sa 911 emergency hotline.
Ayon kay PCPT Mark Anthony P. Encarnacion, Officer-in-Charge ng Romblon MPS, nananatiling handa at nakatuon ang kapulisan sa pagbibigay ng ligtas na kapaligiran upang lubos na ma-enjoy ng publiko ang Biniray Festival 2026 sa diwa ng pananampalataya, pagkakaisa, at pagmamalaking kultural.
Inaasahang dadagsa ang mga deboto at turista sa bayan ng Romblon sa mga susunod na araw bilang bahagi ng pagdiriwang ng pista ni Señor Sto. Niño, kaya’t patuloy ang panawagan ng pulisya sa publiko na pairalin ang disiplina at pakikiisa para sa isang ligtas at matagumpay na pagdiriwang.
