Nagtapos sa ikatlong puwesto si Women FIDE Master (WFM) Jemaicah Mendoza, tubong Sta. Maria, Romblon at kasalukuyang nakabase sa Sta. Rosa, Laguna, sa FIDE World Youth Chess Championships 2025 sa Under-14 Girls’ category na ginanap sa Durres, Albania mula Oktubre 4–15, 2025. Nilahukan ang torneo ng 720 players mula sa 83 bansa sa iba’t ibang panig ng mundo.
Nakakuha si Mendoza ng 8.5 puntos matapos sa 11 rounds, sa kartadang 8 panalo, 1 tabla, at 2 talo, dahilan upang masungkit niya ang bronze medal para sa Pilipinas.
Sa unang bahagi ng torneo, ipinamalas ni Mendoza ang matatag na laro. Sa round 1, tinalo niya si Sevinch Davlatova ng Uzbekistan; round 2, si Fabiana Gomez Gonzales ng Peru; round 3, si Gabriela Harutyunyan ng Armenia; round 4, nagtapos sa tabla kontra kay Mariya Kholyavko ng Kazakhstan; round 5, tinalo si Laksshana Deepak ng Canada; round 6, si VC Nivedita ng India; round 7, si Rukiya Olimova ng Uzbekistan; round 8, natalo kay Vera Vujovic ng Serbia; round 9, muling bumawi laban kay Aknur Mamakova ng Kazakhstan; at round 10, tinalo si Saadat Bashirli ng Azerbaijan.
Naging mahalaga ang final round para kay Mendoza, kung saan may pagkakataon sana siyang makuha ang overall championship, ngunit natalo siya sa kapwa WFM na si Polina Smirnova ng Russia sa 43 moves ng Slav Defence.
Sa pagtatapos ng 11 rounds, itinanghal na kampeon si Polina Smirnova ng Russia, 2nd placer si Rukiya Olimova ng Uzbekistan, at 3rd placer si Jemaicah Yap Mendoza ng Pilipinas.
Bagama’t hindi nakamit ni Mendoza ang kampeonato, tumaas naman ng 140.4 points ang kanyang FIDE rating, mula 1943 tungong 2083.4, na naglagay sa kanya bilang ika-apat na pinakamahusay na babaeng chess player ng Pilipinas, kasunod nina WGM Janelle Mae Frayna (2246), Jan Jodily Fronda (2115), at Ruelle Canino (2110).
