Gaya ng inaasahan, matagumpay na naidepensa ng Japanese Super Bantamweight Undisputed Champion na si 31-anyos Naoya “The Monster” Inoue ang kanyang titulo matapos nyang talunin via knockout ang Korean fighter na si Ye Joon Kim sa 4th round ng kanilang laban noong Enero 24, 2025. Ang laban ay ginanap sa Ariake Arena, Tokyo, Japan.
Si Kim ang naging kapalit ni Australian Sam Goodman, ang orihinal na kalaban ni Inoue, na umatras dahil sa eye injury. Muli, ipinamalas ni Inoue ang kanyang kahusayan, dinomina ang laban mula umpisa hanggang matapos.
Sa kanyang post-fight interview, sinabi ni Inoue na nais niyang lumaban sa US o Saudi Arabia sa kalagitnaan ng taon. Huling lumaban si Inoue sa US noong Hunyo 19, 2021, kontra sa Filipino fighter na si Michael Dasmariñas. Simula noon, lahat ng laban ni Inoue ay ginanap sa Japan.
Ang kanyang pahayag ay suportado ng kanyang promoter na si Bob Arum ng Top Rank, ngunit pinag-iisipan pa kung sino at saan gaganapin ang susunod niyang laban. Sa kasalukuyan, may record si Inoue na 29 wins, 0 loss, at 26 knockouts. Siya rin ay isang 4-division world champion.
Tatlong pangalan ang nangunguna sa listahan ng posibleng makalaban ni Inoue. Ang una ay si Alan “El Rey” Picasso, isang 24-anyos na Mexican boxer na may record na 31 wins, 0 loss, 1 draw, at 17 knockouts. Siya ang No. 1 challenger para sa WBC Super Bantamweight title ni Inoue at kasalukuyang hawak ang WBC Silver Super Bantamweight Championship.
Si Picasso rin ang World’s No. 5 ranked sa Super Bantamweight ayon sa The Ring. Kung matutuloy ang laban, malamang sa US ito gaganapin at aasahan ang malaking suporta mula sa mga Mexican fans.
Ang pangalawa ay si Murodjon Akhmadaliev, isang 30-anyos na Uzbek boxer na may record na 13 wins, 1 loss, at 10 knockouts. Siya ang dating WBA at IBF Super Bantamweight Champion at kasalukuyang Interim WBA Super Bantamweight Champion.
Ang kanyang tanging talo ay mula sa Filipino fighter na si Marlon Tapales via split decision noong Abril 8, 2023, sa San Antonio, Texas. Sinabi ni Akhmadaliev na nadaya siya sa laban na iyon. Posible itong gawin sa Saudi Arabia upang maiwasan umano ang bias sa judging. Siya rin ang No. 1 contender sa WBA belt ni Inoue.
Ang pangatlo ay si Junto Nakatani, isang 27-anyos na Japanese boxer na may record na 29 wins, 0 loss, at 22 knockouts. Kasalukuyang WBC Bantamweight Champion, at dating WBO Flyweight at Junior Bantamweight Champion.
Matagal nang inaasam ng mga Japanese fans ang laban nila ni Inoue, ngunit tila hindi ito mangyayari dahil sa magkaibang timbang nila. Kailangan pang umakyat ni Nakatani ng division upang matuloy ang laban. May laban pa si Nakatani laban kay David Contreras para sa WBC Bantamweight Title sa Pebrero 24, 2025, sa Japan.
Muling lumutang din ang pangalan ng mga undefeated fighters na sina Australian Sam Goodman, na umatras sa naunang laban kontra Inoue, at Englishman Nick Ball, ang kasalukuyang WBA Featherweight Champion.
Habang wala pang tiyak na desisyon, malinaw na marami pa ring naghihintay na hamon para kay Naoya Inoue sa kasalukuyan niyang pangingibabaw sa Super Bantamweight division.
