Nasawi ang isang lalaki sa bayan ng San Fernando, Romblon matapos mauwi sa hamunan ang alitan niya at ng kanyang kapitbahay dahil sa mga manok.
Ayon sa San Fernando Municipal Police Station, hatinggabi ng Biyernes nang dumating umano sa harap ng bahay ni Ricardo Rada ang lalaking nasawi na kinilalang si Ariel Almoguerra para hamunin ang una. Dala ang metal pipe, lumabas si Rada sa kanyang bahay at pinagbigyan ang hamon ni Almoguerra na may dalang metal pipe at bolo.
Nagpang-abot ang dalawa at nagtamo ng stab wound sa kamay si Rada habang ang naghamon naman na si Almoguerra ay nagtamo ng matinding sugat sa ulo na ayon sa Rural Health Unit ay naging sanhi ng kanyang pagkamatay.
Sa patuloy na pag-iimbestiga ng kapulisan, lumalabas na ang nasawi ay matagal nang pinagsasabihan ni Rada na ikulong ang kanyang mga manok dahil kinakain nito ang mga palay ng Rada ngunit hindi umano ito pinapansin ng nasawi.
Hawak na ngayon ng San Fernando Municipal Police Station si Rada at inihahanda na ang kasong homicide laban dito.
