May 16 warehouses ang Department of Social Welfare and Development (DSWD) sa lalawigan ng Romblon na may nakaimbak na mga relief goods bilang paghahanda sa mga kalamidad at iba pang emergency situation.
Ayon kay DSWD MIMAROPA Regional Director Allyp Albert Baybayan sa ginanap na Kapihan sa PIA Romblon, nakapuwesto na sa mga warehouses sa mga lokal na pamahalaan ang mga food at non-food items, kabilang ang family food packs at ready-to-eat food, upang mapabilis ang pamamahagi ng tulong sa mga apektadong residente.
Ipinaliwanag ni Baybayan na bahagi ito ng ‘Buong Bansa Framework' ng ahensya, na naglalayong tiyakin ang pagkakaroon ng suplay ng pagkain at iba pang pangunahing pangangailangan sa mga komunidad bago pa man dumating ang kalamidad.
“Meron tayo sa ngayon sa Romblon, 16 warehouses. Lahat ‘yan ay merong stocks na 30% of their population. Dapat ‘yung prepositioned goods ay akma sa dami ng tao doon sa lugar na ‘yun,” ani Baybayan.
Bukod sa paghahanda para sa mga bagyo, sinabi ni Baybayan na mahalaga rin ang pagkakaroon ng nakaimbak na suplay sa pagharap sa mga posibleng epekto ng iba pang krisis, kabilang ang matinding El Niño.
Dagdag niya, nakikipagtulungan ang DSWD sa mga lokal na pamahalaan upang matiyak na maayos ang pagkakalagay ng mga relief goods at handa itong ipamahagi kung kinakailangan.
Bilang bahagi ng mga susunod na hakbang, pinag-aaralan din ng ahensya ang pagtatatag ng Disaster Resource Center sa probinsya na pamamahalaan ng DSWD. Nakatakdang magsilbi itong warehouse at pasilidad para sa paghahanda at pagbuo ng mga family food pack na ipamamahagi sa mga nangangailangan.
Sinabi rin nito na layunin ng mga hakbang na ito na mapabilis ang pagtugon ng pamahalaan at maihatid agad ang kinakailangang tulong sa mga komunidad na maaapektuhan ng mga kalamidad.
