Sugatan ang pahinante ng isang truck na may kargang marmol matapos itong tumagilid sa kalsadang bahagi ng Sitio Hi-Lander, Brgy Capaclan Romblon, Romblon tanghali ng Linggo, February 27.
Sa imbestigasyon ng Romblon Municipal Police Station, pababa na ng Poblacion ang truck nang mawalan ito ng preno.
Para maiwasan ang kasalubong na tricycle, pinihit umano ng driver ng truck na si Orlando Magracia Magpusao, 53, ang steering wheel sa gilid ng kalsada dahilan upang tumagilid ito at madaganan ang isang tricycle na nakaparada.
Maswerteng walang tao sa nakaparadang tricycle nang mangyari ang aksidente.
Ang pahinanteng si Eric Mangao naman ay tumalon mula sa truck na naging dahilan kung bakit siya nagkasugat.
Ayon sa pulisya, tinatayang aabot sa P170,000 ang halaga ng nasirang tricycle matapos mayupi sa bigat ng dumagan na truck.
Hawak na ng pulisya ang driver ng truck at posibleng maharap sa kaukulang kaso.
