Ginagamit ng Department of Agriculture (DA) ang ₱6.2 bilyong pondong inilabas sa ilalim ng Unified Package for Livelihoods, Industry, Food and Transport (UPLIFT) upang suportahan ang mga magsasaka at mangingisdang apektado ng El Niño at mapanatili ang produksiyon sa agrikultura.
Sa press briefing sa Malacañang nitong Lunes, sinabi ni Agriculture Secretary Francisco Tiu Laurel Jr. na humiling ang DA ng kabuuang ₱45 bilyon sa ilalim ng UPLIFT, kabilang ang pondo para sa mga interbensyon kaugnay ng El Niño.
“Mayroon kaming request na 45 billion. That actually includes sa UPLIFT iyon, kasama na iyong krisis, kasama na iyong El Niño. And out of the 45 billion ay na-release-san na kami ng 6.2 billion (pesos),” ani Tiu Laurel.
Ayon sa kalihim, inaasahan din ng DA ang karagdagang ₱10 bilyon para sa mga kasalukuyang interbensyon laban sa epekto ng El Niño.
Kabilang sa mga planong hakbang ang solar irrigation, solar pumps, solar aerators at karagdagang biofertilizer upang matulungan ang mga magsasaka na mapanatili ang produksiyon sa mga lugar na nakararanas ng kakulangan sa tubig.
Kasama rin sa mga hakbang ang suporta sa mga mangingisdang maaaring maapektuhan ang operasyon dahil sa matinding kondisyon ng panahon.
Samantala, sinabi ni Tiu Laurel na may nakalaang ₱10 bilyon sa 2027 budget para sa Presidential Assistance for Farmers and Fisherfolk program bilang paghahanda sa posibleng epekto ng El Niño.
“For 2027 naman, mayroon nang nailagay kami through the help of Congress na ten billion (pesos) for the Presidential assistance for farmers and fisherfolk. In anticipation of iyong magiging problema sa El Niño,” dagdag ni Tiu Laurel.
Ayon sa DA, bahagi ang mga pondong ito ng patuloy na paghahanda ng pamahalaan upang mapanatili ang produksiyon sa agrikultura at pangisdaan at makapagbigay ng suporta sa mga magsasaka at mangingisda habang umuunlad ang kondisyon ng El Niño.
