Umabot na sa 240,834 ang kabuuang bilang ng electronic Philippine Identification (ePhilID) na naimprenta at naipamahagi ng Philippine Statistics Authority (PSA) Romblon sa iba't ibang bayan sa lalawigan hanggang Oktubre 31, 2026.
Batay sa datos ng PSA Romblon, mula nang simulan ang pag-iimprenta at pamamahagi ng ePhilID noong Oktubre 4, 2022, patuloy ang kanilang pagsisikap na mailapit sa mga residente ang serbisyo sa ilalim ng Philippine Identification System (PhilSys).
Sa naturang kabuuang bilang, 2,445 ePhilID ang naipamahagi sa buong lalawigan noong Oktubre 2026 lamang, bilang bahagi ng patuloy na pagpapalawak ng access ng mga mamamayan sa opisyal na pagkakakilanlan.
Nanguna ang bayan ng Odiongan sa may pinakamataas na bilang ng naipamahaging ePhilID na umabot sa 34,592. Sinundan ito ng bayan ng Romblon na may 28,473 at San Agustin na may 20,298.
Ayon sa PSA, taglay ng ePhilID ang kaparehong functionality at validity ng pisikal na National ID card. Maaari rin itong gamitin bilang opisyal na patunay ng pagkakakilanlan sa mga transaksyon sa iba't ibang tanggapan ng pamahalaan at pribadong institusyon.
Sa pamamagitan ng serbisyong ito, nabibigyan ng mas madaling access ang mga mamamayan sa kanilang National ID na mahalaga sa pagkuha ng mga serbisyo at pagsasagawa ng iba't ibang transaksyon.
Patuloy namang hinihikayat ng PSA Romblon ang publiko na samantalahin ang mga serbisyong inilalapit ng ahensya upang mas mapadali ang pagkakaroon ng opisyal na pagkakakilanlan ng bawat Pilipino.


























