Nakatanggap ng tig-10 kilo ng bigas ang kabuuang 23,879 mahihirap na pamilya sa lalawigan ng Romblon matapos makumpleto ang pamamahagi ng ayuda para sa buwan ng Oktubre sa ilalim ng Rice Assistance Program ng pamahalaang panlalawigan at Bawat Bayan Makikinabang Program na pinondohan sa pamamagitan ng Local Government Support Fund (LGSF) ng administrasyon ni Pangulong Ferdinand Marcos Jr.
Sinimulan ang pamamahagi noong Oktubre 20 sa Sibale Island at ipinagpatuloy sa iba't ibang bayan hanggang sa maihatid ang mga huling sako ng bigas sa Sibuyan Island.
Naglaan ang pamahalaan ng mahigit ₱46 milyon para sa programa na naglalayong makatulong sa mga pamilyang nangangailangan at maibsan ang kanilang gastusin para sa pang-araw-araw na pagkain.
Batay sa paunang alokasyon, nasa 21,000 pamilya lamang ang nakatakdang makatanggap ng ayuda. Gayunman, naglaan ng karagdagang pondo ang pamahalaang panlalawigan, sa pamumuno ni Governor Trina Fabic, upang mapalawak ang saklaw ng programa at mabigyan ng tulong ang mas maraming kwalipikadong benepisyaryo.
Dahil dito, umabot sa 23,879 pamilya mula sa iba't ibang bayan sa Romblon ang nakatanggap ng tig-10 kilo ng bigas bilang karagdagang suporta sa kanilang pangangailangan.
Bahagi ang programa ng mga hakbang ng pamahalaan upang maihatid ang tulong sa mga pamilyang higit na nangangailangan, partikular sa pagtugon sa kanilang pangunahing pangangailangan sa pagkain.


























