Nagdeklara si Pangulong Ferdinand R. Marcos Jr. ng sampung regular holidays at apat na special non-working days sa buong bansa para sa 2027 upang mabigyan ang mga Pilipino ng sapat na panahon para sa paggunita sa mahahalagang okasyong pambansa, panrelihiyon at pangkultura, gayundin sa mga aktibidad kasama ang pamilya at paglalakbay.
Sa Proclamation No. 1427 na nilagdaan ng Pangulo noong Setyembre 8, 2026, kabilang sa mga regular holiday ang New Year’s Day sa Enero 1; Maundy Thursday sa Marso 25; Good Friday sa Marso 26; Araw ng Kagitingan sa Abril 9; Labor Day sa Mayo 1; Independence Day sa Hunyo 12; National Heroes Day sa Agosto 30; Bonifacio Day sa Nobyembre 30; Christmas Day sa Disyembre 25; at Rizal Day sa Disyembre 30.
Itinakda naman bilang special non-working day ang Ninoy Aquino Day sa Agosto 21; All Saints’ Day sa Nobyembre 1; Feast of the Immaculate Conception of Mary sa Disyembre 8; at Last Day of the Year sa Disyembre 31.
Samantala, ituturing na special working day ang EDSA People Power Revolution Anniversary sa Pebrero 25.
Kasama rin sa mga karagdagang special non-working day ang Chinese New Year sa Pebrero 6; Black Saturday sa Marso 27; All Souls’ Day sa Nobyembre 2; at Christmas Eve sa Disyembre 24.
Ayon sa proklamasyon, layunin ng mga special non-working days na bigyan ang mga Pilipino ng mas maraming panahon upang gunitain ang All Saints’ Day, All Souls’ Day at Pasko, makasama ang pamilya, at makatulong sa pagpapalakas ng domestic tourism.
Hiwalay namang ina-anunsyo ang petsa ng Eid’l Fitr at Eid’l Adha depende sa Islamic calendar o sa astronomical calculations. | PND
Discussion about this post