Iginiit ng Malacañang na hindi nakabatay sa kulay pulitika ng isang lokal na pamahalaan ang pag-apruba ng Local Government Support Fund (LGSF), kundi sa pangangailangan, kwalipikasyon at kumpletong dokumentasyon ng mga proyektong isinusumite ng mga LGU.
Ayon kay Presidential Communications Office (PCO) Undersecretary at Palace Press Officer Claire Castro, kailangang maipakita ng mga lokal na pamahalaan sa kanilang mga dokumento at feasibility study ang pangangailangan para sa proyektong kanilang hinihingian ng pondo.
“So depende ’yan sa request. Kung mapapatunayan ninyo through the feasibility studies, sa mga dokumentong ipamimigay ninyo, ibibigay ninyo sa DBM, pag nakita na qualified, ire-release ang pondo, kahit ano ang inyong kulay,” ani Castro.
Sinabi ni Castro na sinusuri ng Department of Budget and Management (DBM) ang mga kahilingan ng mga LGU upang matiyak na kinakailangan ang proyekto, kumpleto ang dokumentasyon at may sapat na batayan para sa paggamit ng pondo.
Nilinaw din niya na ang mga LGU mismo ang nagsusumite ng kanilang mga request at supporting documents sa DBM.
“Sila mismo ang magbibigay sa DBM diretso ng kanilang request. At doon sa request na iyon, ipapakita nila kung bakit sila kailangan mapabigyan sa kanilang request sa pondong kinakailangan nila,” ani Castro.
Gayunman, binigyang-diin ng opisyal na hindi nangangahulugang awtomatikong maaaprubahan ang bawat kahilingan dahil kailangan pa itong dumaan sa pagsusuri ng mga kaukulang ahensya ng pamahalaan.
Itinanggi rin ni Castro ang mga pahayag na ang LGSF ay ibinibigay lamang sa mga lokal na pamahalaang kaalyado ng administrasyon ni Pangulong Ferdinand R. Marcos Jr.
Tinukoy niya bilang halimbawa ang Naga City, na pinamumunuan ni Mayor Leni Robredo, na ayon sa kanya ay nakakuha ng LGSF para sa mga proyekto ng lungsod.
Batay sa pahayag na iniulat ng PND, nakakuha ang Naga City ng ₱450 milyon para sa rehabilitasyon ng Jesse M. Robredo Coliseum at ₱50 milyon para sa heavy equipment na gagamitin sa pagtugon sa mga kalamidad.
Ayon kay Castro, ipinakikita umano ng naturang halimbawa na hindi awtomatikong nakabatay sa political affiliation ang paglalaan ng LGSF, kundi sa pagsusuri sa mga kahilingan at kwalipikasyon ng mga proyekto.
