Mahigit 978,000 low-income members ng Social Security System (SSS) ang nakatanggap na ng ₱2,000 Unified Package for Livelihoods, Industry, Food, and Transport (UPLIFT) Assistance, ayon sa Department of Social Welfare and Development (DSWD).
Sinabi ni DSWD Assistant Secretary Irene Dumlao na kabilang ang mga benepisyaryo sa Group 3 ng UPLIFT program, na sumasaklaw sa mga employed low-income workers na may Monthly Salary Credit (MSC) na mas mababa sa ₱20,000, nakapaghulog ng hindi bababa sa isang SSS contribution noong 2025 o 2026, at may aktibong SSS disbursement account.
“Now for Group 3, ito yung employed, less than Php20,000 ang kanilang Monthly Salary Credit, mayron pong hulog o contribution sa SSS at least once noong 2025 or noong 2026 at may SSS disbursement account, nasa mahigit 978,000 po na mga households na ang naka-receive ng kanilang Php2,000 UPLIFT assistance,” ani Dumlao sa panayam sa PTV-4.
Ayon sa DSWD, direktang ipinapasok ng SSS ang ayuda sa mga rehistradong bank o disbursement account ng mga kwalipikadong benepisyaryo. Tatanggap ang mga ito ng ₱2,000 kada buwan mula Hulyo hanggang Disyembre, o kabuuang ₱12,000 sa loob ng anim na buwan.
Samantala, sinabi rin ni Dumlao na mahigit 4.4 milyong kabahayan na ang nakatanggap ng ₱2,000 UPLIFT assistance para sa buwan ng Hulyo sa lahat ng benepisyaryong saklaw ng programa.
Kabilang dito ang mahigit 2.8 milyong benepisyaryo ng Pantawid Pamilyang Pilipino Program (4Ps) at mahigit 214,000 benepisyaryo ng Walang Gutom Program sa ilalim ng Group 1, habang mahigit 417,000 mahihirap at near-poor households na natukoy sa pamamagitan ng 2024 Community-Based Monitoring System (CBMS) ang nakatanggap na rin ng ayuda sa ilalim ng Group 2.
Nilinaw ng DSWD na hindi na kailangang mag-apply ng mga benepisyaryo para sa UPLIFT Assistance dahil awtomatiko silang natukoy gamit ang umiiral na datos ng pamahalaan.
“Dahil itong UPLIFT assistance ay targeted, ibig sabihin tukoy na po natin kung sino yung makakatanggap ng tulong… hindi na po kinakailangan na mag-apply o magtungo sa isang opisina sapagkat kayo po ay makakatanggap,” dagdag ni Dumlao.
Ang UPLIFT Assistance ay ipinatutupad sa direktiba ni Pangulong Ferdinand R. Marcos Jr. bilang bahagi ng mga hakbang ng pamahalaan upang mabawasan ang epekto ng tumataas na presyo ng mga pangunahing bilihin at ng umiiral na energy emergency sa mga mahihirap at mababang-kitang Pilipino.
Discussion about this post