Inaasahang magsisimula nang matanggap ngayong linggo o sa unang bahagi ng susunod na linggo ng halos isang milyong low-income workers ang kanilang unang cash assistance sa ilalim ng Unified Package for Livelihoods, Industry, Food and Transport (UPLIFT) program ng pamahalaan.
Ito ay matapos isumite ng Social Security System (SSS) sa Land Bank of the Philippines (LandBank) ang paunang listahan ng mga kuwalipikadong benepisyaryo para sa pagproseso ng payout.
Ayon kay Department of Social Welfare and Development (DSWD) Undersecretary Edu Punay, nakahanda na ang rollout ng ayuda para sa mga benepisyaryo ng Group 3, na binubuo ng mga low-income workers na natukoy gamit ang database ng SSS.
“Magandang balita po. Nagsabi na sa amin ang officials ng SSS na naipadala na nila yung listahan sa LandBank. So, very soon, inaasahan namin, siguro pinakamatagal na yung next week na Lunes or Martes. Pero the earliest is until this week ay makakatanggap na po ang mga na-identify na low-income or low-wage earners mula sa registry ng SSS,” ani Punay.
Hindi na kinakailangang mag-apply ng mga benepisyaryo dahil awtomatiko silang natukoy ng pamahalaan gamit ang umiiral na datos mula sa SSS at iba pang government databases. Ang bawat kuwalipikadong manggagawa ay makatatanggap ng ₱2,000 kada buwan mula Hulyo hanggang Disyembre, o kabuuang ₱12,000 sa loob ng anim na buwan.
Ayon sa SSS, kabilang sa mga kwalipikasyon ang pagiging employed member, pagkakaroon ng monthly salary credit na hindi lalampas sa katumbas ng ₱20,000 na kita, may hindi bababa sa isang naitalang SSS contribution noong 2025 o 2026, nakatala sa 2024 Community-Based Monitoring System (CBMS), at may rehistradong disbursement account sa My.SSS bago ang Abril 30, 2026.
Ang Group 3 ay bahagi ng mas pinalawak na UPLIFT program ng administrasyon ni Pangulong Ferdinand R. Marcos Jr., na layong tulungan ang 7.5 milyong mahihirap, near-poor, at low-income households na maibsan ang epekto ng pagtaas ng presyo ng langis at iba pang pangunahing bilihin. Bukod sa low-income workers, kabilang din sa programa ang mga benepisyaryo ng Pantawid Pamilyang Pilipino Program (4Ps), Walang Gutom Program, at mga near-poor households na natukoy sa CBMS.
