Pinuri ni Pangulong Ferdinand R. Marcos Jr. ang Filipina tennis star na si Alexandra “Alex” Eala sa isang pagtanggap sa Malacañang nitong Lunes, at tiniyak ang patuloy na suporta ng pamahalaan sa kanyang propesyonal na karera matapos ang kanyang makasaysayang kampanya sa 2026 Wimbledon Championships.
Sinabi ng Pangulo na hindi lamang ang mga tagumpay ni Eala sa tennis ang ipinagmamalaki ng bansa kundi maging ang kanyang kababaang-loob, disiplina, at patuloy na pagpapakita ng kanyang pagiging Pilipino sa pandaigdigang entablado.
“You have brought such pride to the Philippines, to the Filipinos, and not only because of your success, but also because the grace with which you handle that success,” ani Marcos.
Kinilala rin ng Pangulo ang mga sakripisyong ginawa ng mga magulang ni Eala, sina dating national swimmer Rosemarie Maniego-Eala at negosyanteng Michael Eala, na hinayaang tuparin ng kanilang anak ang kanyang pangarap sa murang edad.
Dumalo rin sa pagtanggap ang First Lady Louise Araneta-Marcos, mga magulang ni Eala, ang kanyang tennis agent na si Carter Lin, at iba pang opisyal ng pamahalaan.
Binigyang-diin ni Marcos na matagal na niyang nakitang malayo ang mararating ni Eala sa mundo ng tennis.
“She's just getting started… and you proved me right,” ani ng Pangulo.
Pinuri rin niya ang pagiging propesyonal ni Eala, na aniya'y hindi agad nasisiyahan sa bawat tagumpay at agad na nakatuon sa susunod na torneo.
Naalala rin ng Pangulo ang naging pahayag ni Eala matapos ang isa sa kanyang mga tagumpay na bagama't masaya siya sa kanyang naabot, iniisip na niya agad ang susunod na kompetisyon.
Sa kasalukuyan, si Eala ang kauna-unahang Filipina na nanalo ng junior Grand Slam singles title matapos masungkit ang 2022 US Open Girls' Singles Championship. Nagwagi rin siya ng women's singles gold medal sa 2025 Southeast Asian Games, ang unang gintong medalya ng Pilipinas sa naturang event mula noong 1994.
Matapos ang kanyang kampanya sa Wimbledon, umakyat si Eala sa World No. 28 ng Women's Tennis Association (WTA) rankings—ang pinakamataas na ranggong naabot ng isang Filipina sa kasaysayan ng professional tennis.
Tiniyak ni Pangulong Marcos na mananatili ang suporta ng pamahalaan at ng sambayanang Pilipino sa batang tennis star.
“If there's anything that we can do to help you, just say so. You have it,” ani ng Pangulo.
