Muling iginiit ni Pangulong Ferdinand R. Marcos Jr. ang panawagan sa Kongreso na amyendahan ang Electric Power Industry Reform Act (EPIRA) upang alisin ang paniningil ng system loss charges at kaukulang value-added tax (VAT) sa mga konsyumer ng kuryente.
Sa kanyang talumpati sa pagdiriwang ng ika-25 anibersaryo ng EPIRA at pagpapasinaya ng kauna-unahang interactive Energy Museum sa bansa noong Hulyo 29 sa Department of Energy (DOE) Energy Center sa Bonifacio Global City, sinabi ng Pangulo na hindi makatarungang ipasa sa mga mamimili ang gastos na dulot ng mga pagkalugi sa sistema ng kuryente.
Binigyang-diin ni Marcos na dapat ay ang aktuwal na konsumo lamang ng bawat sambahayan ang kanilang binabayaran, at hindi ang mga inefficiencies na wala silang kontrol.
Kasabay nito, sinabi rin ng Pangulo na bagama't nakatulong ang EPIRA sa pagbubukas ng power generation sector sa pribadong pamumuhunan, pagpapalawak ng kapasidad sa produksyon ng kuryente, at paglago ng renewable energy sa nakalipas na 25 taon, nananatili pa ring hamon ang mataas na halaga ng kuryente sa bansa.
Nanawagan din siya sa publiko na suportahan ang mga programa ng pamahalaan sa pagtitipid ng enerhiya at pagpapalakas ng energy security, kasabay ng pagpapasinaya sa kauna-unahang Energy Museum na layong palawakin ang kaalaman ng mga Pilipino hinggil sa enerhiya at tamang paggamit nito.
Discussion about this post