Nanawagan si Pangulong Ferdinand R. Marcos Jr. sa Kongreso na agarang amyendahan ang Electric Power Industry Reform Act (EPIRA) upang ipagbawal ang pagpapasa ng systems loss at kaugnay nitong value added tax (VAT) sa mga konsyumer ng kuryente.
Sa kanyang ikalimang State of the Nation Address (SONA) noong Lunes, sinabi ng Pangulo na panahon na upang alisin ang systems loss sa electric bill ng mga mamimili bilang bahagi ng hakbang ng pamahalaan upang mapababa ang halaga ng kuryente.
“Kung pagbawas ng presyo ang usapan, panahon na para tanggalin na natin ang systems loss na pinapasa sa consumer,” ani Pangulong Marcos.
Binigyang-diin ng Pangulo na hindi makatarungan na ang mga konsyumer ang magbayad sa systems loss dahil wala silang pananagutan sa mga pagkawala ng kuryente sa transmission at distribution system.
“Pinapasa ito sa consumer at kinakarga sa bill, at pinapatungan pa ng value added tax. Hindi naman kasalanan ng consumer kung bakit nagkaroon ng systems loss. Kaya hindi naman tama na sila pa ang pagbabayarin dito,” saad ng Pangulo.
Dahil dito, hiniling ni Marcos ang agarang pag-amyenda sa EPIRA upang tuluyang ipagbawal ang pagsingil ng systems loss at ng kaukulang VAT nito sa mga consumer.
“Therefore, we the people, we demand for the immediate amendment of the Electric Power Industry Reform Act, and prohibit charging systems loss against consumers including the value added tax thereon,” aniya.
Ayon sa Pangulo, ang panukalang pagbabago ay bahagi ng mas malawak na layunin ng administrasyon na mapagaan ang gastusin ng mga Pilipino at mapababa ang presyo ng mga pangunahing serbisyo, kabilang ang kuryente.
Discussion about this post