Inanunsyo ni Pangulong Ferdinand R. Marcos Jr. na hindi na kakailanganin ang Guarantee Letter (GL) sa pag-avail ng Medical Assistance to Indigent and Financially Incapable Patients (MAIFIP) sa mga ospital ng Department of Health (DOH).
Sa kanyang ikalimang State of the Nation Address (SONA) noong Lunes, sinabi ng Pangulo na isinama na ang electronic MAIFIP (e-MAIFIP) sa eGovPH Super App, kung saan maaari nang mag-apply online ang mga pasyente.
“May e-MAIFIP na sa mga ospital ng DOH: online at kasama sa ating eGovPH app. Dalawa na lang ang requirement. Wala na ring GL-GL, kaya hindi na kailangang pumila o magmakaawa pa sa sinumang pulitiko,” ani Pangulong Marcos.
Ayon sa Pangulo, layunin ng bagong sistema na gawing mas mabilis at mas maginhawa ang pagkuha ng medical assistance sa pamamagitan ng online application at electronic submission ng mga kinakailangang dokumento.
Sa kasalukuyan, 55 ospital na ang kabilang sa e-MAIFIP system, na inaasahang magpapabilis sa pagproseso ng tulong medikal para sa mga kwalipikadong pasyente.
Binigyang-diin ni Pangulong Marcos na sa pamamagitan ng e-MAIFIP, hindi na kakailanganin ng mga nangangailangan ng tulong medikal na lumapit sa mga pulitiko upang humingi ng Guarantee Letter, dahil direktang maipoproseso ang kanilang aplikasyon sa pamamagitan ng digital platform ng pamahalaan.
