Pinalawig ng Land Transportation Office (LTO) ang bisa ng driver's license, rehistro ng mga sasakyan, at iba pang dokumentong mag-e-expire simula July 1, 2026 bilang tugon sa mga sunod-sunod na isyung nakaapekto sa Land Transportation Management System (LTMS).
Sa ilalim ng Memorandum Circular No. MVL-2026-5271, mananatiling balido hanggang sa susunod na abiso ang Motor Vehicle Registration, Driver's License, Conductor's License, Student Permit, at Medical Certificate na mag-e-expire simula Hulyo 1, 2026.
Ayon sa LTO, layunin ng extension na matiyak ang tuloy-tuloy na pagbibigay ng serbisyo at mabigyan ang publiko ng sapat na pagkakataong maiproseso ang kanilang mga transaksyon nang walang karagdagang bayarin habang inaayos ang mga isyu sa LTMS.
Nilinaw rin ng ahensya na walang sisingiling late fees o penalties sa lahat ng renewal na saklaw ng extension habang nananatiling epektibo ang memorandum circular.
Hinimok ng LTO ang publiko na bantayan ang mga susunod nitong anunsyo hinggil sa petsa ng pagtatapos ng extension at sa ganap na normalisasyon ng mga serbisyo ng LTMS.
Discussion about this post