Limang indibidwal ang inaresto ng Philippine Coast Guard (PCG) Coast Guard Sub-Station (CGSS) Banton matapos mahuling gumagamit ng ipinagbabawal na compressor bilang underwater breathing apparatus sa ilegal na pangingisda sa karagatan ng Dos Hermanas, partikular sa Isabel at Carlota Islets sa Barangay Libtong, Banton, nitong July 7.
Ayon sa PCG, nagsasagawa ng maritime law enforcement patrol ang mga tauhan ng CGSS Banton sakay ng Bantay Dagat patrol boat nang mamataan ang dalawang hindi pinangalanang motor banca na gumagamit ng improvised compressor equipment sa pangingisda.
Ang limang naaresto ay pawang mga residente ng Barangay Lipata, Buenavista, Marinduque. Samantala, anim pang suspek ang nakatakas bago pa man sila maaresto. Kinilala lamang sila sa kanilang mga alyas na “Mon,” “Tapok,” “Piscal,” “Andoy,” “Gara,” at “Rogie,” na pawang sinasabing mga residente rin ng Barangay Tungib, Buenavista, Marinduque.
Nasamsam sa operasyon ang dalawang motor banca na may makina, dalawang 12-horsepower compressor engine na may binurang serial numbers, apat na rolyo ng compressor hose na may kabuuang habang humigit-kumulang 600 metro, isang speargun, apat na pares ng diving flippers, apat na weight belts na may lead sinkers, humigit-kumulang 80 kilo ng iba't ibang uri ng isda, at isang kutsilyo.
Tinatayang aabot sa ₱183,300 ang kabuuang halaga ng mga nakumpiskang kagamitan at huling isda.
Sa paunang imbestigasyon, lumalabas na lumabag ang mga suspek sa Municipal Ordinance No. 01, Series of 2011 ng Bayan ng Banton, kabilang ang pangingisda nang walang municipal permit, pagiging hindi rehistradong mangingisda, at paggamit ng compressor bilang underwater breathing apparatus.
Dinala sa tanggapan ng CGSS Banton ang mga suspek, kasama ang mga nakumpiskang bangka at iba pang ebidensya, para sa dokumentasyon, imbentaryo, at pagsasampa ng kaukulang kaso.
Iginiit ng Philippine Coast Guard na magpapatuloy ang pinaigting nitong operasyon laban sa illegal, unreported, and unregulated (IUU) fishing upang mapangalagaan ang yamang-dagat ng bansa. Hinikayat din nito ang publiko at mga komunidad sa baybayin na agad iulat sa pinakamalapit na Coast Guard unit ang anumang ilegal na aktibidad sa pangingisda.
