Opisyal nang sinimulan sa Banton, Romblon ang pagdiriwang ng ika-29 na Buwan ng mga Katutubong Pilipino, na tampok ang kultura, tradisyon at pamana ng Tribung Bantoanon.
Ang buong Isla ng Banton ay kinikilala bilang isang IP Community at tahanan ng Tribung Bantoanon.
Bahagi ng kick-off activity ang isang Cultural Exhibit na makikita sa lobby ng Municipal Building. Tampok dito ang iba’t ibang kagamitan at bagay na bahagi ng pamumuhay at kultura ng mga Bantoanon.
Isinagawa rin ang community singing ng mga awiting Bantoanon, na sinundan ng pagtatanghal ng mga IP Elder ng tradisyunal na sayaw na Budabel at Patiar.
Nagbahagi rin ng mga mensahe tungkol sa mga karapatan at pagkakakilanlan bilang mga Katutubong Mamamayan sina IPMR President Genaro Fabrero at Municipal IPMR Jefferson Famadico.
Nagbigay rin ng mensahe si Banton Mayor Milagros Faderanga, habang naghatid naman ng pangwakas na paalala at mensahe si Vice Mayor James Fadrilan.
Layunin ng pagdiriwang na bigyang-pansin ang kultura at pagkakakilanlan ng mga Bantoanon at ang patuloy na pagpapanatili at pagpapasa ng kanilang mga tradisyon at pamana sa mga susunod na henerasyon.
