Idineklara ni Pangulong Ferdinand R. Marcos Jr. ang Mayo 27 bilang regular holiday sa buong bansa bilang paggunita sa Eid’l Adha o Feast of Sacrifice.
Sa ilalim ng Proclamation No. 1264, sinabi ng Malacañang na inirekomenda ng National Commission on Muslim Filipinos na idaos ang pagdiriwang ng Eid’l Adha sa Mayo 27 alinsunod sa 1447 Hijrah Islamic Lunar Calendar.
Ang Eid’l Adha ay isa sa pinakamahalagang pagdiriwang sa Islam kasunod ng Eid’l Fitr o Feast of Breaking the Fast.
Sa tradisyong Islamiko, ginugunita sa Eid’l Adha ang debosyon at pagsunod ni Prophet Ibrahim kay Allah matapos niyang ialay ang kanyang anak na si Ishmael bago siya pinagkalooban ng tupa bilang kapalit na alay.
Kasabay rin ng pagdiriwang ang pagtatapos ng Hajj pilgrimage sa Mecca sa Kingdom of Saudi Arabia na isa sa limang haligi ng Islam.
Nakasaad sa Republic Act No. 9849 na ang ika-10 araw ng Zhul Hijja, ang ika-12 buwan ng Islamic Calendar, ay idinedeklarang national holiday para sa pag-obserba ng Eid’l Adha na may movable date.
Nilagdaan ni Acting Executive Secretary Ralph Recto ang Proclamation No. 1264 noong Mayo 21 sa bisa ng awtoridad ng Pangulo.
Discussion about this post