Naglabas si Ferdinand Marcos Jr. ng Executive Order na nagdedeklara ng state of national energy emergency kasunod ng tumitinding tensyon sa Middle East na nakaapekto sa suplay at presyo ng langis sa pandaigdigang merkado.
Batay sa kautusan, itinakda ang deklarasyon matapos matukoy ng Department of Energy na ang sigalot na kinasasangkutan ng Estados Unidos, Israel, at Iran ay nagdulot ng panganib sa global oil supply at nagpasidhi ng pagtaas ng presyo ng krudo. Binanggit din ang epekto ng pagsasara ng Strait of Hormuz, isang mahalagang ruta ng oil shipments, na nagdulot ng limitasyon sa suplay ng petrolyo.
Sa ilalim ng Executive Order, ipatutupad ng pamahalaan ang Unified Package for Livelihoods, Industry, Food, and Transport o UPLIFT bilang koordinadong tugon ng gobyerno sa posibleng kakulangan sa enerhiya. Pangungunahan ng Pangulo ang UPLIFT Committee kasama ang mga kalihim ng iba’t ibang ahensya ng pamahalaan.
Inatasan ang Department of Energy na magsagawa ng mga hakbang para matiyak ang sapat na suplay ng enerhiya, kabilang ang fuel optimization, energy conservation measures, at aksyon laban sa hoarding at manipulasyon ng suplay. Pinahintulutan din ang Philippine National Oil Company at PNOC Exploration Corporation na tumulong sa pagkuha ng kinakailangang fuel supply.
Inatasan din ang Department of Transportation na magpatupad ng mga hakbang para mabawasan ang epekto sa sektor ng transportasyon, kabilang ang fuel subsidies, commuter fare support, pagpapalawak ng libreng sakay, at pagrepaso sa posibleng pagbawas ng toll at iba pang transport-related charges.
Samantala, inatasan ang Department of Social Welfare and Development na pabilisin ang pamamahagi ng tulong sa mga apektadong sektor, habang ang Department of Agriculture ay magtitiyak ng sapat na suplay ng pagkain at tulong sa mga magsasaka at mangingisda.
Hinikayat din ang mga lokal na pamahalaan na magpatupad ng mga hakbang sa kani-kanilang lugar upang makatulong sa pagtugon sa posibleng epekto ng kakulangan sa suplay ng langis.
Mananatiling epektibo ang deklarasyon ng national energy emergency sa loob ng isang taon maliban kung ito ay bawiin o palawigin ng Pangulo.
