Nanawagan si Senador Juan Miguel Zubiri na palawakin ang imbestigasyon ng Senado, hindi lamang sa flood control projects kundi pati na rin sa iba pang infrastructure projects na umano’y may iregularidad.
Ayon kay Zubiri, kabilang sa mga dapat busisiin ang mga rock netting projects, solar lamps, cat’s eye, multi-purpose buildings, road projects, at dredging projects na hindi malinaw kung natapos o hindi.
“Flood control pa lang itong naiimbestigahan ngayon, at sigurado akong marami pang anomalya sa ibang infrastructure projects,” ani Zubiri.
Bilang halimbawa, binanggit niya ang insidente nitong linggo sa Albay kung saan bumagsak ang stage roof na bagong gawa lamang at nadamay ang ilang estudyante. “Bagong gawa lang po ito, pero bumigay agad, natamaan lang ng ulan—hindi pa nga ito bagyo,” dagdag niya.
Giit ng senador, posibleng lumampas pa ang pondong napunta sa ghost at substandard projects kumpara sa misappropriations sa pork barrel scam. Dahil dito, nanawagan siyang papanagutin ang mga sangkot na kontratista at opisyal ng pamahalaan sa pamamagitan ng pagsasampa ng mga kasong plunder, graft and corruption, syndicated estafa, at falsification of public documents kung mapatunayang may peke ring papeles na ginamit.
“These people have dirty money. Barya lang sa kanila ang magpiyansa, kaya dapat siguraduhin natin na non-bailable ang mga kasong ipapataw sa kanila. Let them rot in jail,” ani Zubiri.
Dagdag pa niya, nakausap na niya si Senador Panfilo Lacson na aniya’y sumang-ayon na dapat masampahan ang mga ito ng mga kasong may parusang reclusion perpetua.
