Pinuri ni Senator Manuel “Lito” Lapid si Pangulong Ferdinand “Bongbong” Marcos Jr. sa kanyang matapang at diretsahang talumpati sa ikaapat na State of the Nation Address (SONA), partikular sa panawagan ng pananagutan ng mga nasa likod ng mga palpak na proyektong flood control sa kabila ng bilyong pisong gastos ng pamahalaan.
Ayon kay Lapid, ang ganitong pahayag ng Pangulo ay nagpapakita ng kanyang sinseridad na papanagutin ang mga dapat managot sa patuloy na pagbaha sa kabila ng mga pondong inilaan para rito.
“Panahon na para mailagay sa sentro ng pambansang usapan ang uri ng pamahalaan na tunay na nagbibigay ginhawa sa ating mga kababayan,” ani Lapid sa kanyang opisyal na pahayag.
Binigyang-diin ng senador na sa mga nagdaang taon, pulitikal na bangayan ang naging tampok ng balita at diskurso, samantalang tila napapabayaan ang mga tunay na problema ng taumbayan. Aniya, mahalagang ituloy ang laban kontra krimen at katiwalian, ngunit hindi ito dapat maging hadlang sa maayos na pamumuno.
Para kay Lapid, ang SONA ni Marcos ay isang mahalagang hakbang upang itama ang mga kakulangan ng pamahalaan.
“Umaasa ako na ang nalalabing taon sa termino ni PBBM ay mailalaan sa pagbibigay ng serbisyo sa mga tao. Kailangan natin ng healthcare, edukasyon, elektripikasyon, transportasyon at irigasyon—hindi ang walang katapusang away-pulitika ng mga lider na walang pakialam sa hirap ng mamamayan,” dagdag niya.
Tiniyak din ng senador ang suporta ng Senado sa mga programang makatutulong sa pagpapabuti ng buhay ng mga Pilipino.
“Handa kaming sumuporta sa anumang programa ng pamahalaan na tunay na mag-aangat sa buhay ng ating mga kababayan,” ani Lapid.
