Inanunsyo ng Social Security System (SSS) na magsisimula na sa Setyembre 2025 ang tatlong taong sunod-sunod na taas-pensyon para sa kanilang mga pensioners, bilang tugon sa direktiba ni Pangulong Ferdinand R. Marcos Jr. na palakasin ang kapakanan ng mga senior citizen at mga benepisyaryo ng pensyon.
Ayon sa SSS, layunin ng Pension Reform Program na makatulong sa mga pensioner na makaagapay sa pagtaas ng presyo ng bilihin, mapanatili ang halaga ng kanilang benepisyo, at pasiglahin ang kahalagahan ng pagtatrabaho at pag-iimpok. Ang dagdag-pensyon ay ipatutupad kada taon tuwing buwan ng Setyembre, sa loob ng tatlong taon mula 2025 hanggang 2027.
Tatanggap ng 10 porsyentong umento ang mga retirement at disability pensioners, habang 5 porsyento naman ang itataas para sa mga death o survivor pensioners. Tanging mga pensioner na aktibo bilang miyembro hanggang Agosto 31 ng taon ng implementasyon ang makakatanggap ng dagdag. Halimbawa, ang mga pensioner na tumatanggap ng pensyon hanggang Agosto 31, 2025, lamang ang pasok sa increase sa Setyembre 2025. Ganoon din ang patakaran para sa mga increase sa 2026 at 2027.
Sa pagtatapos ng tatlong taon, tinatayang tataas ng 33% ang kabuuang pensyon para sa retirement at disability pensioners, habang aabot naman sa 16% ang kabuuang taas para sa mga survivor pensioners.
Naglabas din ang SSS ng sample computation upang ipakita ang epekto ng dagdag na benepisyo sa tatlong taon ng implementasyon. Tiniyak ng ahensya na ang programang ito ay bahagi ng pangmatagalang reporma sa sistemang panlipunang seguridad na layuning protektahan ang kinabukasan ng mga manggagawa sa pribadong sektor.
