Ipinangako ni Pangulong Ferdinand R. Marcos Jr. na gagamitin ng pamahalaan ang lumalagong sektor ng turismo bilang pangunahing sandata sa paglikha ng trabaho sa Pilipinas, lalo na para sa natitirang porsyento ng mga Pilipinong walang hanapbuhay.
Sa kanyang ika-apat na State of the Nation Address (SONA) nitong Lunes, sinabi ng Pangulo na mas paiigtingin ng mga ahensya ng pamahalaan, kabilang ang Department of Tourism (DOT), Department of Labor and Employment (DOLE), Department of Trade and Industry (DTI), at Department of Social Welfare and Development (DSWD), ang paghahanap ng mga oportunidad sa trabaho.
“Magpupursige ang DOLE, DTI, DSWD, kasama na rin ang DOT, at mga kaugnay na ahensiya, sa paghahanap ng paraan at mga oportunidad para sa natitirang apat na porsiyento ng ating puwersang manggagawa na hanggang ngayon, walang trabaho,” ani Marcos.
Sa taong 2024, umabot sa 8.9% ng kabuuang ekonomiya ng bansa ang kontribusyon ng turismo, na nagbigay rin ng tinatayang 6.75 milyong direktang trabaho sa mga Pilipino.
Tumaas din ang domestic tourism expenditure sa ₱3.16 trilyon, mas mataas kaysa sa pre-pandemic level na ₱3.14 trilyon noong 2019. Samantala, ang international tourism spending ay umabot sa ₱699 bilyon, mula sa ₱600 bilyon bago ang pandemya.
