Inatasan ni Pangulong Ferdinand R. Marcos Jr. ang masusing imbestigasyon sa mga flood control project ng pamahalaan na umano'y naging palpak o hindi natapos, kasunod ng pananalasa ng habagat na nagdulot ng matinding pagbaha sa ilang bahagi ng bansa ngayong Hulyo.
Sa kanyang ika-apat na State of the Nation Address (SONA) nitong Lunes, binigyang-diin ng Pangulo ang mga isyu ng katiwalian na matagal nang ikinakabit sa mga proyektong pang-kontrol sa baha.
“Kitang-kita ko na maraming proyekto para sa flood control ay palpak at gumuho. Yung iba ay guni-guni lang,” pahayag ni Marcos.
“Huwag na po tayong magkuyari, alam naman ng buong madla na nagkakaraket sa mga proyekto: mga kickback, mga initiative… SOP, for the boys,” dagdag nito.
Mariing hinimok ng Pangulo ang mga opisyal at kontratistang sangkot sa anomalya na managot at mahiya sa bayan.
“Mahiya naman kayo sa inyong kapwa Pilipino. Mahiya naman kayo sa mga kababayan nating naanod o nalubog sa baha. Mahiya naman kayo lalo sa mga anak nating magmamana sa mga utang na ginawa n’yo,” dagdag pa ni Marcos.
Inatasan din ni Marcos ang Department of Public Works and Highways (DPWH) na magsumite ng listahan ng lahat ng flood control projects na sinimulan o natapos sa huling tatlong taon.
Aniya, rerepasuhin ng Regional Project Monitoring Committee ang listahang ito upang tukuyin ang mga proyektong palpak, hindi natapos, o pinaghihinalaang ghost projects.
“Kailangan malaman ng taong bayan ang buong katotohanan. Kailangan may managot sa pinsala at katiwalian,” pahayag ng Pangulo.
Dagdag pa niya, ang naturang listahan ay isasapubliko upang makuha ang feedback ng mga mamamayan. Magsasagawa rin ng performance audit upang matukoy kung paano ginastos ang pondo ng bayan.
“Sa mga susunod na buwan, makakasuhan ang mga lalabas na may sala sa imbestigasyon pati na ang mga kasabwat na kontratista sa buong bansa,” babala ni Marcos.
