Nilinaw ng Municipal Social Welfare and Development Office (MSWDO) ng Cajidiocan na walang sapilitang ginawa ang kanilang tanggapan sa mga senior citizen kaugnay ng isyu sa umano’y pagpipilit sa mga matatanda na pumunta personal sa kanilang opisina upang kunin ang cash gift, na nauugnay sa pagpanaw ng dalawang senior citizen noong Hulyo 7, 2025.
Sa opisyal na pahayag ng MSWDO, mariin nilang itinanggi na pinilit ang sinuman, lalo na ang mga may karamdaman, na pumunta sa kanilang tanggapan. Ayon sa kanila, may mga proseso at alternatibong paraan para matanggap ng mga benepisyaryo ang tulong kahit hindi sila makapunta nang personal, gaya ng pag-authorize sa mga kaanak upang tumanggap ng benepisyo.
Ipinaliwanag din ng MSWDO na isa sa mga senior citizen ay personal na dinala ng kanyang anak, habang ang isa pa ay hindi dinala sa opisina at ang cash gift ay inihatid mismo sa bahay ng kinatawan ng National Commission on Senior Citizens (NCSC) at ng OSCA head ng barangay. Dahil dito, giit ng MSWDO, walang katotohanan ang mga akusasyon ng pamimilit.
Hinimok rin ng MSWDO ang publiko, lalo na ang mga vlogger, na maging maingat sa pagbabahagi ng impormasyon online at tiyakin muna ang pinagmulan ng kanilang mga post upang maiwasan ang pagkalat ng maling impormasyon na maaaring magdulot ng takot at pagkalito sa komunidad.
“Mahigpit naming pinapahalagahan ang kapakanan ng mga senior citizen at ang katotohanan sa likod ng bawat isyu. Hindi namin kailanman layunin na mapahamak ang sinuman,” ayon sa pahayag.
Patuloy umano ang pagsusumikap ng MSWDO upang mapabuti ang serbisyo para sa mga nakatatanda at tiniyak na bukas sila sa makabuluhang ugnayan at pakikipag-ugnayan sa mga pamilya ng mga senior citizen.
“We encourage the public not to engage with the misleading social media posts,” paalala ng tanggapan.
Nagpahayag rin ng pakikiramay ang MSWDO sa mga naulilang pamilya at nangakong gagawin ang lahat upang matiyak ang dignidad at kaligtasan ng mga benepisyaryo ng programa.
