Tumanggap ng tig-₱50,000 cash incentive ang mga senior citizen na edad 95 taong gulang sa bayan ng Cajidiocan, Romblon mula sa Pamahalaang Panlalawigan ng Romblon bilang pagkilala sa kanilang mahabang buhay at mahalagang ambag sa pamilya at komunidad.
Isinagawa ang pamamahagi noong Nobyembre 17, 2026 sa pamamagitan ng door-to-door payout upang personal na maihatid ang tulong pinansyal sa mga kwalipikadong benepisyaryo at hindi na nila kinailangang magtungo sa tanggapan ng pamahalaan upang matanggap ang naturang insentibo.
Pinangunahan ni Office of the Senior Citizens Affairs (OSCA) Head Elna Rey ang pamamahagi, katuwang ang mga kawani ng Department of Social Welfare and Development (DSWD) Cajidiocan Office.
Layunin ng programa na kilalanin at bigyang-halaga ang mga nakatatandang mamamayan na umabot sa edad na 95, bilang pagpapakita ng pagpapahalaga sa kanilang buhay, karanasan at mga naging kontribusyon sa kanilang pamilya at lipunan.
Sa pamamagitan ng naturang inisyatiba, patuloy na ipinakikita ng Pamahalaang Panlalawigan ng Romblon ang suporta at malasakit nito sa sektor ng senior citizens, partikular sa mga nakatatandang nangangailangan ng pagkilala at tulong mula sa pamahalaan.


























