Inavail ng mga senior citizen, Persons with Disabilities (PWD), at mga buntis ang early voting hours na itinakda ng Commission on Elections (COMELEC) sa iba’t ibang bahagi ng lalawigan ng Romblon ngayong Hatol ng Bayan 2025.
Sa Anahao Integrated School, ilang senior citizen ang maagang dumating at bumoto. Maayos ang naging daloy ng botohan at agad na nakaboto ang karamihan sa mga nakatatanda.
Naglagay naman ng assistance counter ang Parish Pastoral Council for Responsible Voting (PPCRV) sa Odiongan North Central Elementary School upang tulungan ang mga botanteng nahirapang hanapin ang kanilang presinto. Naging mabilis at maayos ang pagtukoy ng kanilang precinct number sa tulong ng mga volunteers.
Sa Esteban M. Madrona Elementary School, dumagsa ang mga botante simula alas-8 ng umaga. May hiwalay na pila para sa mga senior citizen, ngunit bumagal ang proseso ng pagboto dahil sa mabagal na pagbasa ng balota ng automated counting machine. Bukod pa rito, naranasan din ng lugar ang halos kalahating oras na malakas na pag-ulan sa Barangay Bachawan, na nakaapekto rin sa paggalaw ng pila.
Sa Barangay Ambulong, Magdiwang, Romblon, maagang pumila ang mga senior citizen sa labas ng polling precinct bago pa man ang itinakdang oras para sa early voting. Eksaktong alas-5:12 ng umaga nang opisyal na nagsimula ang botohan para sa mga priority voters. Pagsapit ng alas-7:00 ng umaga, marami pa ring senior at PWD ang nakapila habang ang iba naman ay nasa waiting area. Sinimulan na rin ang pagtanggap sa mga regular voters sa parehong oras.
Ayon sa COMELEC, layunin ng early voting hours na bigyan ng mas ligtas at komportableng pagboto ang mga kabilang sa vulnerable sectors upang maiwasan ang siksikan at abala sa mga regular na oras ng halalan. (with reports from Mona Lyn Almarines, Jayson Dela Cruz)
