Mariing pinabulaanan ng Commission on Elections (Comelec) nitong Lunes ang kumakalat na pekeng impormasyon sa social media na inilipat umano ang halalan mula Mayo 12 patungong Mayo 10 dahil sa matinding init ng panahon.
“Fake news na naman, sinasabing inilipat ang eleksyon mula May 12 at gaganapin ito ng May 10 dahil sa matinding init. Walang katotohanan ’yan,” ani Comelec Chairperson George Garcia sa isang panayam.
Ang nasabing infographic ay nagpapalaganap ng maling impormasyon na diumano’y may “Comelec official” na nagsabing ipagpapaliban ang eleksyon sa Mayo 12 at ililipat ito sa Mayo 10 dahil sa matinding init na iniulat ng PAGASA.
Ngunit giit ni Garcia, walang anumang dahilan o kondisyon na makapipigil sa pagsasagawa ng halalan sa itinakdang petsa.
“Tuloy ang halalan sa lahat ng presinto sa buong Pilipinas sa Mayo 12,” diin ni Garcia.
Nang tanungin kung bakit may ganitong uri ng disinformation, sinabi ni Garcia na ito ay posibleng layuning guluhin, lituhin ang mga botante, at bawasan ang lalabas para bumoto sa araw ng halalan.
“Bukod sa layuning bawasan ang mga botante, nais talaga nilang sirain ang kredibilidad ng Comelec at ang ating proseso,” dagdag pa niya.
Samantala, inanunsyo rin ng Comelec na sila ay humiling na kay Pangulong Ferdinand R. Marcos Jr. na ideklara ang Mayo 12 bilang holiday upang mabigyan ng pagkakataon ang mga mamamayan na makaboto.
