Bilang bahagi ng paghahanda para sa nakatakdang halalan sa Lunes, Mayo 12, sabay-sabay na isinagawa ngayong Lunes ang Final Testing and Sealing (FTS) ng mga vote counting machines (VCMs) sa iba’t ibang voting precinct sa buong lalawigan ng Romblon, ayon sa Commission on Elections (COMELEC).
Layunin ng aktibidad na tiyaking maayos ang operasyon ng mga makina at handa na ang mga ito sa mismong araw ng botohan.
Bahagi rin nito ang paglalagay ng security seals at pagsasagawa ng test voting gamit ang mga test ballots upang suriin kung tama at eksakto ang pagbibilang ng mga boto ng makina.
Sa mga barangay ng Cantagda at Danao sa bayan ng Cajidiocan, maaga pa lamang ay nagtungo na ang mga poll watchers mula sa iba’t ibang partido upang saksihan ang proseso. Ang kanilang presensya ay alinsunod sa layunin ng COMELEC na maging bukas at transparent ang aktibidad sa publiko at mga tagamasid ng halalan.
Wala namang naitalang aberya o problema sa mga nasabing lugar, ayon sa mga election officials.
Nauna nang sinabi ni Provincial Election Supervisor Atty. Ryan Santos na 90 hanggang 95 porsyento na ang antas ng kahandaan ng COMELEC Romblon para sa halalan sa susunod na linggo.
