Inaasahan ng Commission on Elections (Comelec) na dadami pa ang mga ulat ng vote buying at abuse of state resources (ASR) habang papalapit ang halalan sa Mayo 12.
Ayon kay Commissioner Ernesto Maceda Jr., namumuno sa Kontra Bigay Committee ng Comelec, karaniwang tumataas ang ganitong mga aktibidad sa huling linggo ng kampanya.
“Umaasa kami na dadagsain kami ng mga ulat ng vote buying at ASR sa mga darating na araw, lalo na’t 10 araw na lang bago ang eleksyon,” ani Maceda sa programang Bagong Pilipinas Ngayon.
Hinimok ni Maceda ang publiko na magsumite ng ulat sa pamamagitan ng email (committee.kontrabigay@comelec.gov.ph) o sa Facebook page ng Comelec (https://www.facebook.com/comelec.ph/).
“Gawin po ninyong bodycam ang inyong sarili—kami po’y inyong mga mata’t tainga. Sama-sama po nating sugpuin ang mga anay ng demokrasya: vote buying at pang-aabuso sa pondo ng bayan,” aniya.
Ayon sa Comelec, nasa 309 reklamo na ng vote buying at ASR ang kanilang natanggap. Pinakamarami sa Calabarzon (64), kasunod ang Central Luzon (54), National Capital Region (52), Mimaropa (20), at Bicol Region (20).
Karamihan sa reklamo ay tumutukoy sa pamimigay ng pera, mga produkto, at iba pang mahalagang bagay.
Mas mababa pa rin ito kumpara sa 1,226 reklamo na natanggap noong May 2022 elections.
Batay sa datos ng Comelec hanggang Abril 30, nakapag-isyu na ang Kontra Bigay Committee ng show cause orders sa 213 kandidato at party-list groups — 130 kaugnay ng vote buying, at 67 kaugnay ng ASR.
