Nakarekober muli ang mga sundalo ng panibagong taguan ng armas na pinaniniwalaang iniwan ng mga teroristang miyembro ng New People’s Army (NPA) sa Sitio Malatongtong, Barangay Aguas noong Linggo, Abril 4.
Ayon sa ulat mula sa 203rd Infantry Brigade, nadiskubre ng mga tropa ng 68th Infantry Battalion ang taguan ng armas habang nagsasagawa sila ng security operations sa nasabing lugar. Ang pagkakatuklas ay nag-ugat sa impormasyon na ibinahagi ng isang hindi pinangalanang impormante.
Kabilang sa mga narekober ang isang M16 rifle, isang M14 rifle, pitong magazine, at dalawang magazine spring.
Ayon kay Major General Cerilo Balaoro Jr., commander ng 2nd Infantry (Jungle Fighter) Division, ang pagkakarekober sa mga armas ay nagpapakita ng paghina ng puwersa ng natitirang mga armadong grupo sa lugar.
Dagdag pa niya, naging posible ang sunud-sunod na pagkakatuklas ng mga taguan ng armas dahil sa tuloy-tuloy na operasyon ng militar at sa pakikipagtulungan ng mga mamamayan sa pagbibigay ng tamang impormasyon.
Patuloy din ang panawagan ni Balaoro sa publiko na manatiling mapagmatyag at makipagtulungan sa mga awtoridad upang tuluyang matigil ang banta ng terorismo at insureksyon sa rehiyon.
Hinimok din niya ang natitirang mga miyembro ng NPA na tanggapin ang alok ng pamahalaan sa ilalim ng amnesty program at magbalik-loob upang makapamuhay nang mapayapa kasama ang kanilang pamilya.
Ang bagong taguang ito ang ika-anim na armas cache na narekober ng 2ID ngayong taon, kasunod ng mga narekober na armas sa mga lalawigan ng Quezon at Camarines Norte. Patuloy ang isinasagawang operasyon ng militar sa buong Mindoro upang tiyakin ang seguridad ng mga komunidad.
