Nasabat ng mga tropa ng Philippine Army ang tinatayang 876 kilo ng hinihinalang methamphetamine hydrochloride o shabu na nagkakahalaga ng humigit-kumulang P5.95 bilyon mula sa isang twin speedboat na sumadsad sa baybayin ng Paluan, Occidental Mindoro.
Ayon kay Maj. Gen. Ramon Zagala, commander ng 2nd Infantry Division, natuklasan ang insidente bandang alas-3 ng hapon noong Martes matapos makatanggap ng impormasyon ang mga sundalo ng 76th Infantry Battalion mula sa isang concerned citizen.
Ipinagbigay-alam umano ng mga tauhan ng Citizen Armed Force Geographical Unit (CAFGU) at military personnel mula sa kanilang patrol base sa Pinagbayanan na may sumadsad na speedboat sa Sitio Agbalite, Barangay Harrison.
Nang rumesponde ang mga sundalo, nakita umano ang dalawang lalaki na tumatakbo palayo sa speedboat.
Ayon kay Zagala, posibleng ang dalawang lalaki ang nagpapatakbo ng bangka at nagkaroon ng aksidente bago ito sumadsad sa pampang.
Sa inspeksyon ng mga awtoridad sa bangka, nadiskubre ang 43 sako ng hinihinalang shabu na may kabuuang timbang na 876 kilo.
Kalaunan ay naaresto rin sa parehong bayan ang dalawang lalaking tumakas, na napag-alamang mga Chinese national, habang sinusubukan umanong makakuha ng sasakyang-dagat upang makatakas.
Bukod sa mga hinihinalang ilegal na droga, nakarekober din ang mga awtoridad ng isang Starlink communication device, walong hand flares, tatlong fire extinguisher, apat na baterya, dalawang life jacket, at dalawang lifebuoy mula sa speedboat.
Ayon kay Zagala, bagamat kahawig ng shabu ang mga nakuhang kristal na substance batay sa mga larawan, hihintayin pa rin ang confirmatory examination ng Philippine National Police (PNP) upang matiyak ang uri ng nasabat na droga.
Sa ngayon, dinadala na ng militar ang mga nakumpiskang kontrabando sa Abra de Ilog bago ito i-turnover sa PNP para sa karagdagang imbestigasyon.
