Nagpahayag ng pakikiramay si Senador Lito Lapid sa mga biktima ng trahedyang naganap sa Lapu-Lapu Day Festival sa Vancouver, Canada, kung saan labing-isa ang nasawi at mahigit tatlumpu ang nasugatan matapos araruhin ng isang sasakyan ang mga dumalo sa pagdiriwang noong Abril 26, 2025.
Ayon sa mga ulat, isang itim na Audi Q7 SUV ang sumalpok sa mga tao sa East 43rd Avenue malapit sa Fraser Street bandang 8:14 ng gabi.
Ang Lapu-Lapu Day Festival ay isang taunang pagdiriwang ng Filipino heritage sa Vancouver na kinikilala ng pamahalaan ng British Columbia mula pa noong 2023. Ang selebrasyon ay nagbibigay-pugay kay Datu Lapu-Lapu, ang bayaning Pilipino na tumalo kay Ferdinand Magellan sa Labanan sa Mactan noong 1521.
Si Senador Lapid, na gumanap bilang Lapu-Lapu sa pelikulang “Lapu-Lapu,” ay nanawagan sa mga awtoridad sa Vancouver na magsagawa ng masusing imbestigasyon upang mabigyan ng hustisya ang mga biktima. Ipinaabot din niya ang kanyang taos-pusong pakikiramay sa mga pamilya ng mga nasawi at nasugatan.
“Ipinaabot ko sa mga pamilya nila ang taus-pusong pakikiramay sa mga naulila ng nasawi nating mga kababayan sa Vancouver,” pahayag ni Lapid.
